हरिदत्त देवकोटा
पालुङ्टार ३, गोरखा (हाल चितवन)
१) क्या राम्रो गोरखा लिगलिगकोट नाच्दछ शिरैमा
देवकोटा थर हरिदत्त नाम त्यो गाउँघरैमा ।
पण्डित गाउँ देवकोटा थर गौरव हाम्रो छ
जयन्ति देवी त्यो पण्डित गाउँ बिद्धानको खानी छ ।
२) बिद्धान भए देवकोटाहरु जयन्ति देविले
आर्शिवाद पाई विश्वमा चम्के विद्याको ज्योतिले ।
मन्त्री र डाक्टर पण्डित भए शिक्षा छ अपार
डाँडा र काँडा हावा र पानी प्रकृति हजार ।
३) त्यो ठाउँ रम्छ खुसि भै अनि मन्त्री र डाक्टरले
पण्डित ज्ञानी बिद्धान विक्रम तेजस्वी हुनाले ।
अमृत जल त्यो भन्दा राम्रो पाईन्छ कहाँ र
त्यो हावा पानी शितल मिठो बासना हरर ।
४) मनैलाई खिच्ने त्यो सुन्दर गाउँ गोधुली साँझमा
गाउँ र वेसी हरिया पहाड हिमाली छायाँमा ।
प्रकृति राम्रो मिलेको ठाउँ भन्ज्याङ देउराली
तितरी पन्छि क्वेलि र न्याउलि खेल्दछिन् बनभरी ।
५) नागवेली खोला बग्दछिन् रातमा कल कल गरेर
त्यो चिसो हावा सरर बग्छ अमृत छरेर ।
गाई र भैसी वाँधेको घर गोरस पवित्र
लालि र गुँरास भैचम्पा फूल क्या राम्रो सचित्र ।
६) न्याउली चरि बीलौना गर्दै स्वर मिलाई रातमा
कुखुरा बास्छ विहानी पख घडीको डाकमा ।
उज्यालो भयो बिहानीपख चिरबीर भाकामा
सुसेली हाली त्यो चिबेचरी घुम्दछे पाखामा ।
७) त्यो मेरो गाउँ त्यो मेरो ठाउँ विद्धानको वासले
स्वर्गको एक टुक्रा झै लाग्यो प्रकृती खासले ।
ऐसेलु काफल चुत्रो नै फल्थे बन र पाखामा
त्यो लालुपाते फुल्दछ फेरी डाँडाको शिरैमा ।
८) अर्म र पर्म त्यो मेलापाता हाम्रो त्यो पहिचान
घैया र मकै फापर र कोदो झुल्दथे बगान ।
सकेर बस्छन् थकाई मारि डिल र चौतारी
संगित ध्वनी गाउँथे मिठो मिलेर दौंतरी ।
९) घरमा आई घरधन्दा गर्छन दुःख र सुखको
मसिनो गुन्द्रि परालको बुनि अछ्याउँछन् ल्याएर ।
ढिडो र रोटी जो पाक्छ घरमा मिष्ठन्न मानेर
कुपुक्क खायो घुप्लुक्क सुत्यो निन्द्रामा परेर ।
१०) त्यो लालिपन क्षितिजमा छायो अन्धकार हटाई
डोको र नाम्लो पिठ्युमा धरी त्यो गाग्री समाई ।
पुरानो ठाउँ क्या राम्रो लाग्छ स्वर्गकै कानन
यै पुन्ज उठी नेपाल ढाक्यो प्रताप फैलन ।